بلدنا نيوز
رأي بلدنا

غادة قطاطة تكتب:ابعد على الاستهتار وشد الدار

الكاتبة غادة قطاطة
الكاتبة غادة قطاطة

من التعليقات والبوستات اللي نشوف فيها توجعت على قلة الوعي والإدراك بخطورة الوضع.

الموت علينا حق و ربي قال بعد بسم الله الرحمن الرحيم: قل لن يصيبنا إلا ما كتب الله لنا... احتمال انك تموت في اي لحظة 100% واحتمال انك تموت بالكورونا 1%. ايمانك قوي و راضي بحكم ربي وقضاه. انا معاك و كيفك و نأيدك اللي الروح بيد ربي. اما انا شادة داري مش خوفا على روحي خاطر الموت عمري ماخفت منها اما خايفة اني نكون سبب في موت غيري، و إلا غيري يكون سبب في وجيعة عايلتي اللي ماشافوش بنتهم من 3 سنين. الواحد يخاف على عايلته و احبابه و صحابه والناس اللي يعرفهم واللي مايعرفهمش. هذا مش خذيت برنشيت قوي والا عندك الكحة بمغرفة عسل تتنحى. هذا وباء قاتل مدمر البشرية فالكرة الأرضية. احنا مش جهال ولا اميين ولا حشاكم حيوانات باش مانفهموش شمعناها وباء، في ايران في 3 ايام ماتوا 853 واحد وقرابة 15 ألف مصاب. أكثر من 1800 واحد ماتوا في ايطاليا و 25 الف مصاب؛ أكثر من 7000 واحد ماتوا فالعالم بسبب الكورونا في اسبوعين، أكثر من 182 ألف مصاب فالعالم تي أشهر نجوم هليود اتصابوا واغلى لاعبين الكرة اتصابوا،، الفلوس ماتعالجش واذا عالجتهم و نقل العدوى لطفل صغير و لحد كبير او لمريض ماعندوش مناعة يكون سبب في دمار عايلة كي يرزيهم في الغالي عليهم.
كل نهار يتزاد العدد بالميات خاطر الاستهتار والاستهانة بالوباء. اللي يقول كذبة إعلامية و اللي يقول ثورة اقتصادية واللي يقول بفعل فاعل. يقولوا و قولوا اللي تحبوا تو مش وقت نفتيوا وقت نسكروا البيبان ونشدوا الديار بجاه ربي خافوا على غيركم اذا ماتخافوش على رواحكم. خليونا الكل نحطوا اليد فاليد و نسمعوا التعليمات ونتبعوا الوقاية اللازمة باش نتجاوزوا هالمحنة ماتضيعوناش بكسوحية الراس و الاستهتار.

ربي يشفي كل مريض و يبارك في صحة كل صحيح و يبعد على كل المسلمين كل الأمراض والاوبأة ويحمي الإنسانية من الجهل والدمار. الجاهل مش اللي مايعرفش الجاهل اللي يعرف و مايطبقش اللازم.

بلدنا نيوز مصر مقالات رأي فيروس كورونا غادة قطاطة تونس

رأي بلدنا